Property Expo
×

လက်ရှိမှာ ကြော်ငြာတွေ၊ ဓာတ်ပုံတွေ၊ မဂ္ဂဇင်းတွေရိုက်ဖြစ်နေတဲ့ လုလုအောင်က Posh မဂ္ဂဇင်းရဲ့ဖက်ရှင်ကဏ္ဍမှာလဲ အလန်းစားစတိုင်တွေနဲ့ရိုက်ကူးပေးထားပါသေးတယ်။ ဒါ့အပြင် နှစ်စဉ်နှစ်တိုင်း နှစ်သစ်ကူးရောက်တိုင်း မွေးရပ်မြေဖြစ်တဲ့ ကချင်ပြည်နယ် မြစ်ကြီးနားမြို့ကို အလည်ပြန်လေ့ရှိတဲ့ လုလုအောင်က ဒီနှစ်မှာလဲ မြစ်ကြီးနားကို အလည်ပြန်ရင်း စစ်ဘေးသင့်ကလေးတွေနဲ့သွားရောက်တွေ့ဆုံမယ်လို့သိရပါတယ်။ ဒါ့အပြင်ရှေ့ရက်တွေက ဖေ့စ်ဘွတ်လူမှုကွန်ယက်ပေါ် တော်တော်လေးရေပန်းစားသွားတဲ့ လုလုအောင်ရဲ့ အမျိုးသားဟာ ဘယ်သူဘယ်ဝါဖြစ်တယ်ဆိုတဲ့ အကြောင်းတွေကြောင့်  လုလုအောင်ဆီ သူမရဲ့သဘောထားလေး သွားရောက်မေးမြန်းဖြစ်တဲ့အခါ

-လူမှုကွန်ယက်ပေါ်မှာရှေ့ရက်တွေက အစ်မရဲ့အမျိုးသားဆိုပြီးတက်လာတာတွေ့ရတယ်။ အဲ့ဒါလေးကိုလဲပြောပြပေးပါဦး။

အဲ့ဒါကသူ့ကို ကျွန်မလဲ မမြင်ဖူးပါဘူး။ ဟာသသဘောအနေနဲ့လုပ်ထားတာ ထင်ပါတယ်။ သူ့ကိုသိလဲ မသိပါဘူး။ ကျွန်မတွေ့လဲမတွေ့ဖူးဘူး။ ပျော်စေပျက်စေသဘောမျိုးနဲ့လုပ်တာပဲ ထင်ပါတယ်။ တကယ်တော့မဟုတ်ပါဘူး။ ကျွန်မသူငယ်ချင်းတွေဆို အဲ့ဒါကိုကြည့်ပြီး ဟာသလုပ် ရယ်နေကြတယ်။

-အဲ့ဒါဆို အဲ့ဒီလူကြီးနဲ့ဘာမှမဆိုင်ဘူးပေါ့နော်။

မဆိုင်ပါဘူး။ မြင်လဲမမြင်ဖူးဘူး။ တွေ့လဲမတွေ့ဖူးဘူး။ ဆိုင်လဲမဆိုင်ပါဘူး။

-အဲ့ဒီလူကြီးကအစ်မအမျိုးသားဆိုပြီးထွက်လာတဲ့အပေါ်မှာရော ဘယ်လိုမြင်မိလဲ။

ဘယ်လိုမှမမြင်ပါဘူး။ ဟာသသဘောနဲ့ရေးတာလို့ပဲထင်ပါတယ်။ သူတို့လဲ တကယ်မသိလို့လျှောက်ရေးတာလေ။ အဲ့ဒါနဲ့ပတ်သက်ပြီးထွေထွေထူးထူးတော့ဘာမှမဖြစ်ဘူး။ ရယ်စရာတစ်ခုလို့ပဲမြင်ပါတယ်။

-အစ်မအရင်အမျိုးသားကရော အပြင်လောကကပဲလား။

သူကအပြင်လောကကပါ။ ကျွန်မကလေးရဲ့အဖေက မွန်ပါ။ ကလေးရဲ့အဖေကမွန်လူမျိုးဆိုတာ အားလုံးသိကြပါတယ်။ တချို့ကလဲ သိကြပါတယ်။ တချို့မသိတဲ့သူတွေကျတော့လဲ အခုဟာကိုတကယ်လို့ထင်နေကြပါတယ်။

-ကလေးအဖေဘယ်သူဆိုတာကိုရော ပရိသတ်ကိုပြောပြချင်သေးလား။

မပြောပြတော့ပါဘူး။ သူလဲသူလွတ်လပ်ခွင့်နဲ့သူရှိပါစေ။ သူ့ဘ၀နဲ့သူရှိပါစေတော့။ ပရိသတ်ကိုလဲမဖော်ပြတော့ပါဘူး။

-ကွာရှင်းထားတာရောဘယ်လောက်ကြာသွားပြီလဲ။

သုံးနှစ်လောက်ရှိပါပြီ။

-အစ်မအနေနဲ့နောက်အိမ်ထောင်ပြုဖို့ရော အစီအစဉ်ရှိဦးမလား။

စကားကတော့ကုန်အောင်မပြောချင်ပါဘူး။ ပြောလဲမပြောတတ်သေးဘူး။ လောလောဆယ်ကတော့ ပြုဖို့အစီအစဉ်မရှိသေးပါဘူး။

-အခုလက်ရှိ အနုပညာလှုပ်ရှားမှု အနေနဲ့ဘာတွေလုပ်ဖြစ်နေလဲ။

အခုကကြော်ငြာလေးတွေရိုက်ဖြစ်တယ်။ ပြက္ခဒိန်တွေရိုက်ဖြစ်နေတယ်။ နောက်မဂ္ဂဇင်းအတွက်ရိုက်ပေးဖြစ်တယ်။ အွန်လိုင်းကြော်ငြာလေးတွေရိုက်ထားဖြစ်တယ်။ ရိုက်ထားဖြစ်သလောက်က ဖေ့စ်ဘွတ်မှာတင်ထားပါတယ်။

-New Year ကိုရောဘယ်လိုဖြတ်သန်းဖြစ်မလဲ။

နှစ်ကူးတိုင်း ကချင်ပြည်နယ်ကိုပြန်နေကြဆိုတော့ New Year ကမြစ်ကြီးနားမြို့ပေါ်မှာရှိရင်ရှိမယ်။ နောက်စစ်ဘေးသင့်ကလေးတွေဆီကိုလဲ သွားမှာဆိုတော့ အဲ့ဒီမှာလဲ ရှိရင်ရှိမယ်ပေါ့။ စစ်ဘေးသင့်ကလေးတွေနဲ့ရှိဖြစ်ရင်တော့ သူတို့နဲ့ကစားမယ်။ သူတို့အတွက် တစ်ခုခုချက်ကျွေးဖြစ်မယ်။ နောက်လက်ဆောင်ပေးရင်ပေးမယ်။ သေချာတာကတော့ ကလေးတွေနဲ့ရှိဖို့များတယ်။ သွားမဲ့ရက်ကဘယ်နေ့မှန်းမသိသေးလို့ပါ။

-အခုလက်ရှိဖြစ်နေတဲ့စစ်ပွဲတွေအပေါ် အစ်မစိတ်ခံစားချက်လေးကိုလဲသိချင်ပါတယ်။

စိတ်ခံစားချက်ကတော့ စစ်မဖြစ်ရင်အကောင်းဆုံးပေါ့။ အဲ့ဒီလိုတွေဖြစ်တဲ့အခါ ထွက်ပြေးပုန်းရှောင်ရင်းနဲ့စစ်ဘေးဒုက္ခသည်တွေများများလာတယ်။ ကလေးတွေဆိုရင်လဲ သူတို့ရဲ့ ပညာရေးတွေနောက်ကျကျန်ခဲ့တယ်။ လူမှုရေးတွေဆိုရင်လဲအဲ့ဒီလိုပဲ။ အဲ့ဒါကြောင့်စစ်ပွဲတွေမရှိတော့ပဲချုပ်ငြိမ်းသွားမယ်ဆိုရင်တော့အကောင်းဆုံးပေါ့။

-ခရစ်စမတ်တိုင်းပြန်တဲ့အခါ အစ်မတို့ဟိုမှာဘာတွေလုပ်ဖြစ်လဲ။

အမှတ်တရကတော့ ခရစ်စမတ်မှာ အိမ်တိုင်းပွဲတွေ လုပ်တယ်။ အိမ်မှာအေးအေးဆေးဆေးနားနေတယ်။ နောက်ကိုယ့်ရဲ့ဆွေမျိုးအိမ်တွေကို သွားလည်တယ်။ လက်ဆောင်တွေ ဘာတွေသွားပေးတယ်။ ညနေဆိုရင်တော့ မီးလှုံတယ်။ မြစ်ကြီးနား အစားအစာတွေစားတယ်ပေါ့။

-ဟိုတလောက posh မဂ္ဂဇင်းအတွက်ရိုက်ထားတာတွေ့ရတယ်။ ပုံတွေကအလန်းဆိုတော့ လက်ခံရိုက်ကူးဖြစ်ပုံလေးကိုလဲသိချင်ပါတယ်။

 အဲဒါက Posh မဂ္ဂဇင်းအတွက် အထဲက ဖက်ရှင်ကဏ္ဍအတွက်ပါ။ ရန်ကုန်မှာပဲရိုက်တာပါ။ အဲ့ဒီပုံလေးတွေကိုလက်ခံရိုက်ကူးဖြစ်တာကတော့ သူ့ရဲ့brand ကလဲအတွင်းခံဆိုတော့ အဲ့ဒါနဲ့လိုက်ဖက်အောင်တော့ရိုက်ရတာပေါ့နော်။ ဒါပေမဲ့ခြုံပုဝါ ထပ်ဝတ်ပြီးရိုက်ထားပါတယ်။ ထွက်လာရင်သိကြမှာပါ။ အရမ်းမရိုင်းပါဘူး။

-အဲ့ဒီလိုမျိုးအလန်းဒီဇိုင်းတွေထပ်ရိုက်ဖို့လက်ခံထားတာရောရှိဦးမလား။

လောလောဆယ်တော့မရှိသေးပါဘူး။

-အခုနောက်ပိုင်း လူမှုကွန်ယက်တွေပေါ်မှာ တွေ့နေရတဲ့သက်ငယ်မုဒိန်းမှုတွေနဲ့ပတ်သက်ပြီးအစ်မရဲ့အမြင်လေးကိုလဲသိချင်ပါတယ်။

သက်ငယ်မုဒိန်းမှုကတော့ ဖေ့စ်ဘွတ်မှာလဲတစ်ရက်ပြီးတစ်ရက်ပေါ်လာတယ်။ စိတ်မကောင်းဘူး။ ကလေးတွေဆိုတာ ဘာမှလဲမသိဘူး။ ဘာမှလဲနားမလည်ဘူး။ အဲ့ဒီလိုသတင်းတွေမြင်ရ၊ တွေ့ရ၊ ကြားရတာတကယ်ပဲစိတ်မကောင်းပါဘူး။ သေဒဏ်ပေးတာမပေးတာကတော့ အစိုးရတွေနဲ့ဆိုင်တာပေါ့။ အကောင်းဆုံးကတော့ ထိထိရောက်ရောက်နဲ့နောင်ကျဉ်သွားအောင်နောက်ထပ် မလုပ်ရဲတော့အောင်အပြစ်ပေးစေချင်ပါတယ်။

-သမီးမိန်းကလေးမွေးထားတဲ့မိခင်တစ်ယောက်အနေနဲ့ကိုယ့်ရဲ့ကလေးကို ဘယ်လိုမျိုးထိန်းသိမ်းထားသင့်လဲ။

အဓိကကတော့ ကလေးတွေကို အရမ်းမပစ်ထားဖို့၊ မိန်းကလေးဖြစ်ဖြစ်၊ ယောကျာ်းလေးဖြစ်ဖြစ်ဂရုစိုက်သင့်တယ်။ လက်လစ်စပယ်ဟိုလူနဲ့ထည့်တာမျိုး၊ ဒီလူနဲ့ထည့်တာမျိုးတွေရှောင်သင့်တယ်။ ကိုယ်မပါရင် ဘယ်မှ မလွှတ်သင့်ဘူး။ အဓိကကတော့ ကိုယ့်ကလေးနဲ့ကိုယ်အမြဲတတွဲတွဲရှိနေသင့်ပါတယ်။

-အစ်မရိုက်တဲ့ အချို့သောဓာတ်ပုံတွေနဲ့ပတ်သက်ပြီး အစ်မသမီးရဲ့အမြင်ကဘယ်လိုရှိလဲ။

အရင်တုန်းကလဲ ရိုက်ဖူးတော့မြင်တော့မြင်ဖူးပါတယ်။ ဒါပေမဲ့သူကတော့ ပါးစပ်ကထုတ်ဖော်မပြောဘူး။ သူသိပ်မကြိုက်ဘူးလို့တော့ ကျွန်မထင်တယ်။ အဲ့ဒါကြောင့်လဲလျှော့ရိုက်ပါတယ်။ သိပ်မရိုက်တာတောင်ကြာပါပြီ။
 
 
နေ့စဉ်သတင်းအသစ်များကို Email ပို့ပေးပါမည်။
သင်၏ Gmail ကို အောက်တွင် ဖြည့်စွက်၍ Submit လုပ်ပါ။
 
 
Top